الجمعة، 4 يوليو 2008

شرف البنت زى عود الكبريت


كتير سمعنا عبارة إن شرف البنت زى عود الكبريت بيولع مرة واحدة ، دلوقتى بقى زى الولاعة ، يولع كذا مرة والبركة فى التكنولوجيا
الموضوع حساس جدآ ومحتاج جرآة ، ومش عارفه ليه طرح أى موضوع يمس الشرف بشكل خاص والمرأة بشكل عام بيعتبرها المجتمع موضوعات حرجة ولا يجب المساس بها أو حتى مجرد الحوار والنقاش فيها لأنها بتمس موروثاتنا وتقاليدنا وعاداتنا وكأننا بنتكلم عن أهرامات الجيزة مثلأ .
والطرح لم أخجل منه كإمرأة لأنى لم أستخدم كلمات خارجة أو بذيئة وإن كانت فى نظر البعض خارجة عن المألوف ، وهذا يؤكد إننا فعلآ مش صادقين مع نفسنا فى اللى بنطرحة فى أغلب اللى بننشره أو بنتكلم فيه وإلا كنا إعتبرناه كلام واضح وصريح ولم يخجل منه البعض
، أما عن وجهة نظرى الشخصية فى الأمر فأنا أرى أن غشاء البكارة ( ليس هو الوحيد ) المسؤل عن عفة وطهارة ونقاء الفتاه ، لأن المسألة بقت سهل جدآ ترميمها وكأن لم يكن ، وللتوضيح أكتر بقى فيه عمليات تدخل فيها الطب الحديث وبيطلق عليها ( ترقيع أو رتق ) يعنى عمل غشاء بكارة بديل للغشاء الطبيعى والبنت اللى بتتعرض لإغتصاب أو أى حادث ممكن يفقدها غشائها أو حتى اللى بتفقدة بإرادتها بتروح للدكتور تعمل العمليه دى بسهوله
بصراحة بقى اللى مجننى فى الموضوع إن الراجل الشرقى بيتعرف على البنت من دول وهات يا بوس وأحضان والذى منه ، وأول ما البنت تسلم له الكبريت ، يخلع منها ويكون سبب تحويلها من كبريت بيولع من أول مره إلى ولاعة مليانه غاز يولع أول ما يشم النار على طول .
وبالرغم إن الشاب اللى إتورط مع البنت فى نفس العلاقة اللى كان السبب فيها إنها تفقد عذريتها ، إلا إن المجتمع الشرقى بيحاسب البنت ومش بيحاسب الشاب بحجة إنه راجل ، الحقيقة أنا مش بدافع عن البنت ولا باتهم الرجل ، لكن لى سؤال لكل رجل وشاب
هل ممكن تقبل الزواج من فتاه فقدت عذريتها ؟؟
ولو حصل ووافقت ، نظرتك لها بعد الزواج ممكن تكون عاملة إزاى ؟؟
ممكن تقول إنها مش عذراء لأحد أصدقائك أو من أهلك أو أى شخص بتثق فيه ؟؟
نظرة المجتمع للفتاة التى فقدت عذريتها بشكل عام ، هل لها تأثير على قرارك فى الزواج منها ؟؟
خليك صريح وقول بدون خجل